Ræbbblar gera við reiðhjól

Hópur pönkara hefur stofnað reiðhjólagengið Ræbbblarnir sem ætlar að setja á fót verkstæði í sumar þar sem fólk getur búið til hjól og lagað gömul með aðstoð gengisins. Ætlar gengið að sækja um skapandi sumarstarf hjá Hinu húsinu í von um að fá styrk til verkefnisins. Einnig stendur til að halda nokkra styrktartónleika til að koma þessari athyglisverðu hugmynd á koppinn.

Að sögn Viktors Orra Dieterssonar Pollitz voru Ræbblarnir stofnaðir fyrir um tveimur árum. „Ég og tveir vinir mínir fórum út á pönkfestival sem var haldið í Ungdomshuset í Kaupmannahöfn. Meðfram hátíðinni var haldið „bike-festival" í húsasundunum þar sem pönkarar voru að búa til hjól og kepptu síðan í því að klessa hver á annan. Okkur fannst þetta svo töff að við ákváðum að stofna þennan klúbb," segir Viktor Orri, sem er sjálfur meðlimur pönksveitarinnar Brat Pack.

Fjórir pönkarar ætla að starfa við verkstæðið í sumar en alls eru um tuttugu manns í klúbbnum. Ef allt gengur að óskum verður haldin hjólreiðahátíð í sumar þar sem hjólin sem verða búin til á verkstæðinu verða sýnd. Bendir Viktor Orri jafnframt á netfangið[email protected] ef fólk vill senda til hans biluð eða ónýt hjól.

Hann segir lítinn skilning vera fyrir hjólreiðamenningu í Reykjavík og vill að úr því verði bætt. „Það eru allir að berjast við að gera Reykjavík að heimsborg en Íslendingar virðast ekki átta sig á því að plássið er að minnka og minnka. Það er ekki endalaust pláss fyrir stæði og bíla og oft er ekki gert ráð fyrir að fólk geti labbað eða hjólað yfir umferðarbrautir."

Fyrstu styrktartónleikar Viktors og félaga verða haldnir í Hljómalind í kvöld.

Fram koma Innvortis, Deathmetal Supersquad, Retron, The Best Hardcore Band in the World og Brat Pack. - fb