Watford ætlar að reka Flores

Watford ætlar að reka Quique Sánchez Flores úr starfi knattspyrnustjóra liðsins. Frá þessu er greint í enskum fjölmiðlum í dag.

Watford tapaði fyrir Southampton í gær, 2-1, og er á botni ensku úrvalsdeildarinnar. Watford er með átta stig eftir 14 leiki, sex stigum frá öruggu sæti.

Flores tók við Watford í byrjun september eftir að Javi Gracia var rekinn.

Spánverjanum hefur ekki tekist að snúa gengi Watford við og liðið hefur aðeins unnið einn af tíu deildarleikjum undir hans stjórn.

Flores stýrði Watford áður tímabilið 2015-16.