„Það gerast alltaf einhverjir töfrar á milli okkar þegar við komum fram“

Kælan Mikla, sem er skipuð Laufeyju Soffíu, Sólveigu Matthildi og Margréti Rósu, hefur vakið athygli fyrir einstakan hljóm sinn víða um heiminn og fer velgengni sveitarinnar vaxandi. Þær eru nýkomnar heim úr tónleikaferðalagi um Evrópu þar sem þær spiluðu í 29 borgum og það er margt spennandi á döfinni. Blaðamaður tók púlsinn á hljómsveitarmeðlimum þremur.

Hvaðan sækið þið innblástur í ykkar tónlistarsköpun og framkomu á sviði?

Við sækjum innblástur frá íslenskri náttúru, þjóðsögum og göldrum. Þar að auki fjöllum við oft um andlega líðan, þunglyndi, sorg og sálarangist, og blandast það oft inn í sögurnar í textunum okkar. 

Kælan Mikla er andi ísdrottningar sem köllum fram á sviði þegar við þrjár komum saman, við bjóðum áhorfendum að stíga inn í þennan kalda töfraheim og upplifa ævintýrin með okkur.

Hafa þessir tónleikar verið lengi í bígerð?

Platan Undir köldum norðurljósum kom út í nóvember síðastliðnum og síðan þá höfum við unnið að því að útsetja og æfa lögin á meðan Covid-faraldurinn gaf okkur ekki færi á að flytja hana á tónleikum. Við fórum svo á fimm vikna tónleikaferðalag um Evrópu í 29 borgir, nú erum við nýkomnar heim og munum loksins flytja nýju lögin hér heima í bland við lög af fyrri plötum.

Hvernig hafa undanfarnir mánuðir verið hjá ykkur?

Samhliða útgáfu fjórðu plötunnar okkar gáfum við út fjögur tónlistarmyndbönd sem við unnum í samstarfi við bæði íslenska og erlenda leikstjóra og listamenn, með það að markmiði að gefa hlustendum okkar myndræna innsýn inn í galdra heim Kælunnar Miklu. Við erum alltaf með mörg járn í eldinum og erum stöðugt að vinna að því sem koma skal.

Hvernig undirbúið þið ykkur fyrir það að stíga á svið? Eruð þið með heilaga rútínu rétt fyrir tónleika?

Það mikilvægasta er að eiga góða stund sem vinkonur og njóta þess að finna lognið á undan storminum.

Hvað finnst ykkur skemmtilegast við að koma fram og flytja tónlist?

Það er mjög gaman að vinna að því að gera tónleika flutninginn sem áhrifaríkastan, skapa leikrænan heim og gera þetta að okkar eigin ritúal. Það gerast alltaf einhverjir töfrar á milli okkar þegar við komum fram, sem binda okkur saman sem eina heild. 

Við verðum að Kælunni Miklu. 

Það er líka lang mest gefandi þegar áhorfendur segjast upplifa tónlistina á sterkan hátt, eða að hún hafi jafnvel hjálpað þeim í gegnum erfiðleika.

Hvað er á döfinni?

Í framhaldi af útgáfutónleikunum okkar tekur við fjöldi sumar-tónlistarhátíða um alla Evrópu, svo erum við að vinna að undirbúningi næstkomandi túra um Norður-Ameríku og Evrópu. Þess á milli vonumst við til að gefa út allavega eitt nýtt lag á þessu ári, það er alltaf nóg að gera!

Útgáfutónleikarnir fara sem áður segir fram á Gauknum á laugardaginn 4. júní og hefjast klukkan 20:00. Ásamt Kælunni Miklu koma fram pönksveitin GRÓA og þeramín drottningin Hekla. Miðaverð er 3000 krónur, miðasala fer einungis fram við hurð og hljómsveitarmeðlimir hvetja því áhugasama til að mæta tímanlega. Að tónleikunum loknum verður hægt að versla hljómsveita varning og plötusnúðurinn DJ Mighty Bear tekur við með tónlist fram á rauða nótt.