„Framtíðin er spennandi en hún kemur ekki bara heldur búum við hana til“

Ása Ninna Pétursdóttir skrifar 12. febrúar 2021 09:28

Lindu Björgu Árnadóttur, dósent í fatahönnun við Listaháskóla Íslands, hefur verið boðið sæti í ritstjórn tímaritsins Journal of Textile Research.

„Þetta er mikill heiður og ég sé mig fyrir mér í framtíðinni að vinna meira við rannsóknir og skrif ásamt því að ég hef áhuga á að ritstýra blöðum í mínu fagi,“ segir Linda Björg Árnadóttir, dósent í fatahönnun við Listaháskóla Íslands, í samtali við Vísi.

Lindu Björgu hefur verið boðið sæti í ritstjórn tímaritsins Journal of Textile Research and Practice sem gefið er út af Routledge útgáfunni sem er í eigu Taylor & Francis group. Það er einn stærsti útgefandi rannsókna- og vísindatímarita í heimi og var sú útgáfa stofnuð í Bretlandi árið 1852. Fyrirtækið er með skrifstofur um allan heim og hjá þeim starfa um 1800 manns.

Þetta er mjög mikill heiður og verð ég mikið að lesa yfir greinar og gagnrýna. Ég mun vinna í því að fá fólk til þess að senda greinar inn til ritstjórnar sem eru að vinna við framsækin og áhugaverð verkefni í textílhönnun og framleiðslu. Þessi staða gefur mér framtíðarmöguleika í útgáfu greina um rannsóknir í textíliðnaði og hönnun. Einnig mun ég koma með hugmyndir að þemum og áherslum sérblaða.

Linda Björg er bæði menntuð sem sem textíl- og fatahönnuður. Hún er með MS gráðu frá Viðskiptafræðideild Bifrastar en er núna í doktorsnámi við félagsfræðideild Háskóla Íslands þar sem að hún leggur stund á rannsóknir í félagsfræði og tísku.

Með þessari nýju stöðu í ritstjórn blaðsins segist Linda nú þurfa að fylgjast vel með hvað er að gerast í faginu ásamt því að byggja upp tengslanet við áhugaverða aðila.

Journal of textile Research and Practice er eitt fremsta tímarit í heimi sem birtir greinar um rannsóknir í textíliðnaði og textílhönnun. Linda segir textíliðnaðinn vera einn stærsta, elsta og mikilvægasta iðnað í heimi og þar hafi orðið ótrúlegar framfarir síðustu ár þegar kemur að sjálfbærni og siðferði.

Mér finnst tískuiðnaðurinn vera að aðlagast breyttum aðstæðum mjög vel. Ég tel að meiri breytingar verði framundan og þeim muni fylgja ný tækifæri. Það er meiri áhugi núna á að versla góða vöru sem endist og er framleidd með gott siðferði í huga.

Það er óhætt að segja að Linda hafi í nægu að snúast því einnig á hún og rekur textílfyrirtækið Scintilla. Scintilla leggur áherslu á framsækin munstur og náttúruleg og lífræn efni en er verslunin er staðsett á Laugavegi í miðbæ Reykjavíkur.

„Framtíðin er spennandi en hún kemur ekki bara heldur búum við hana til,“ segir Linda að lokum.“