Maður hefur ekki allan tímann í heiminum

Hreimur Örn Heimisson gaf út sína fyrstu sólóplötu, Eftir langa bið, í síðustu viku. Platan hefur verið í vinnslu í átta ár.

"Ég er afskaplega stoltur af þessari plötu og trúi því að fólk eigi eftir að fíla hana ágætlega. Hún er upprunaleg og einlæg og að minnstu leyti tekin upp í hljóðveri, sem ég vona að skili sér til hlustenda," segir söngvarinn Hreimur Örn Heimisson.

Hreimur sló í gegn í lok síðustu aldar með sunnlensku hljómsveitinni Landi og sonum. Með sveitinni gaf hann út fimm plötur en þetta er hans fyrsta sólóplata. Hún ber heitið Eftir langa bið og dregur nafn sitt af því hvað hún hefur verið lengi í vinnslu.

"Flest lögin eru samin á árunum 2000 til 2006 og platan sjálf hefur verið á teikniborðinu frá 2004," segir Hreimur. Tvö laganna á plötunni eru samin sama dag og lagið Lífið er yndislegt, en það lag er tvímælalaust vinsælasta lag Hreims til þessa og eitt vinsælasta lagið á Íslandi síðustu ellefu árin. "Ég var í svaka gír heima hjá ömmu minni þann dag. Þar var ég að fletta gömlum bókum og fann ljóð eftir afa minn frá 1970 sem greip mig algjörlega. Ég samdi lag við það og úr varð lagið Góða nótt. Bak við það fann ég svo ljóðið Gamlárskveðja sem Hannes Hafstein samdi um 1890 og ákvað að semja lag við það líka," rifjar Hreimur upp.

Öll lögin á plötunni eru samin af honum sjálfum og spurður hvort mikill Lands-og-sona-fílingur sé á henni hlær hann við. "Ég samdi flest lögin sem Land og synir gáfu út, svo melódíurnar eru kannski ekki ókunnuglegar. Mér finnst nálgunin og áferðin samt alls ekki vera Lands-og-sona-leg," segir hann.

Gestasöngvarar á plötunni eru Færeyingurinn Jógvan Hansen og ung stúlka að nafni Hildur Vala Baldursdóttir. "Ekki sú sama og vann Idol heldur Hildur Vala júníor," segir Hreimur og hlær.

Það var í kjölfar þátttöku Hreims í Eurovision 2011 með Vinum Sjonna að hann ákvað að láta loks af plötunni verða.

"Það koma svona áminningar af og til um að maður hefur ekki allan tíma í heiminum. Ég ákvað þá að þessi plata skyldi koma út árið 2012 svo ég rétt næ að standa við það," segir Hreimur sem fylgir plötunni eftir með útgáfutónleikum í Austurbæ 22. nóvember.

Hér má nálgast miða á tónleikana

[email protected]

Aftur í Eurovision 2014Hreimur Örn keppti í Eurovision fyrir Íslands hönd árið 2011 þegar Vinir Sjonna fóru til Þýskalands með lagið Aftur heim, eða Coming Home. Auk þess hefur hann tekið þátt í undankeppninni hérna heima nokkrum sinnum.

Færeyingurinn Jógvan Hansen er keppninni ekki ókunnur heldur og tók þátt í undankeppninni árin 2010 og 2011. Þeir hafa nú ákveðið að sameina krafta sína og hyggjast senda inn tvö lög fyrir keppnina 2014.

"Við ákváðum að láta Svíþjóð eiga sig en ætlum upp í sumarbústað eftir áramót og leggja drög að tveimur lögum til að senda til keppni 2014. Við erum búnir að handsala þetta og allt saman. Það er samt nokkuð ljóst að við gerum ekki neitt án þess að hafa Vigni Snæ með okkur," segir Hreimur og hlær.

"Eurovision er yndislegt fyrir íslenskt samfélag. Sama hvort þú elskar eða hatar keppnina gefur hún öllum tækifæri til að hittast í góðu partíi tvisvar sinnum á ári," bætir hann við.