Vogue myndar tísku í Hörpu

"Vogue hefur boðað komu sína hingað í næsta mánuði og ætlar að mynda stóran tískuþátt,"staðfestir Anna Margrét Björnsson, kynningarfulltrúi tónlistarhússins Hörpu, og segir um leið að húsið sé orðið eftirsótt myndefni.

Sjónvarpsstöðvar, tímarit og fyrirtæki víða að úr heiminum sækjast eftir að fá að mynda í tónlistarhúsinu við sæinn. Sem dæmi má nefna bækling bílaframleiðandans Hyundai, þar sem Harpa leikur lykilhlutverk, og haustbækling bandarísku verslunarkeðjunnar Bloomingdales sem var myndaður í Hörpu í sumar.

Tískubiblían Vogue er þekkt fyrir stóra myndaþætti þar sem fræg nöfn í tískuheiminum koma oftar en ekki við sögu. Anna Margrét vill ekki gefa meira upp að svo stöddu um tökuna, en staðfestir að um stóran myndaþátt sé að ræða.

Anna Margrét segir starfsfólk Hörpu taka fyrirspurnum á borð við þessar fagnandi, enda sé þetta fyrst og fremst góð landkynning og góð kynning á húsinu á erlendri grundu. "Við erum stöðugt að fá fyrirspurnir erlendis frá um leyfi til að mynda í húsinu. Við gleðjumst yfir því að Harpa er að verða nýtt kennileiti á Íslandi. Ég tel að glerhjúpur Hörpu heilli, enda er hann bæði einstakur og fallegt listaverk."

Anna Margrét útskýrir að öllum sé að sjálfsögðu frjálst að mynda í opnum svæðum Hörpu. "En sé ætlunin að mynda í auglýsingaskyni þarf að fá leyfi hjá okkur. Séu ljósmyndir af Hörpu notaðar í auglýsingaherferðum, eins og í tilviki Hyundai, er greidd höfundarréttargreiðsla. Húsið er að stimpla sig inn á alþjóðlegum vettvangi og það má jafnvel segja að Harpa sé að komast í tísku."

[email protected]