Veisla hefst í Hallgrímskirkju

Á morgun hefst 27. starfsár Listvinafélags Hallgrímskirkju. Eins og undanfarin ár fer nýtt starfsár af stað með myndlistarsýningu og Jólatónlistarhátíð í Hallgrímskirkju.

Sigurlaug Jóhannesdóttir sýnir verk tengd íslenskri náttúru undir yfirskriftinni Smáblóm, sýningin verður opnuð í lok hátíðarmessu klukkan 12 á morgun.

Um kvöldið eru fyrstu Jólatónleikar Mótettukórs Hallgrímskirkju og Drengjakórs Reykjavíkur þar sem fluttar verða margar aðventu- og jólaperlur, en þetta er í fyrsta sinn sem þessir kórar leggja saman krafta sína á jólatónleikum, en tónleikarnir verða endurteknir tvívegis, á miðvikudag og næsta sunnudag.

Dagskrá félagsins er eins og áður mjög metnaðarfull. Tónlist, myndlist, leiklist og ritlist mynda samfellda dagskrá, sem nær fram að aðventu 2009. Af fjölda dagskráratriða má nefna þrjár óratóríur, Messías eftir Handel, Hallgrímspassíu eftir Sigurð Sævarsson og frumflutning á óratóríunni Cecilía eftir Áskel Másson, Jólatónlistarhátíð í desember, fimm Sigurbjörnsvökur og minningardagskrá um Sigurbjörn Einarsson á föstu, frumflutning fimm kóra á 50 lögum við Passíusálmana eftir Jón Ásgeirsson á föstudaginn langa, Alþjóðlegt orgelsumar og þrjár myndistarsýningar.

Listvinafélagið hefur fengið fjölda listafólks til liðs við sig, bæði innlent og erlent. Það kann einhverjum að þykja að það skjóti skökku við í því efnahagslega árferði sem nú er að bjóða upp á svo metnaðarfulla dagskrá segja þau hjá Listvinafélaginu en undirbúningur fyrir þessa viðamiklu dagskrá sem miðast við kirkjuárið stendur alla jafna frá vori til byrjunar vetrar. Þar er sú skoðun ofan á, að oft sé þörf en nú nauðsyn, að halda uppi öflugu félags-, menningar-, og listastarfi. Með samstilltu átaki og miklu sjálfboðaliðastarfi vill Listvinafélagið leggja sitt af mörkum til þess.

[email protected]