Ronaldo fær frí á miðvikudag

Ungstirnið Cristiano Ronaldo fær frí frá leik Manchester United og Villareal á Spáni á miðvikudagskvöldið, vegna fráfalls föður hans á dögunum. Ronaldo var ekki með liði sínu í jafnteflinu gegn grannaliðinu Manchester City á laugardaginn og Alex Ferguson ætlar að gefa honum lengri tíma til að jafna sig. "Ég sagði honum að vera bara hjá móður sinni þangað til búið er að ganga frá málum í fjölskyldunni," sagði Ferguson, sem saknaði piltsins greinilega í leiknum um helgina.