Tekur vinnustaðurinn þinn þátt?

Við getum öll verið sammála um það að skynsamleg hreyfing gerir okkur gott, ekki satt? Flestir vita þetta og flestir vita einnig að ef við hreyfum okkur ekki nóg mun heilsunni að öllum líkindum hraka. Þolið minnkar og vöðvamassinn rýrnar sem gerir það að verkum að allar daglegar athafnir verða enn erfiðari, sem gerir það enn erfiðara fyrir okkur að koma okkur af stað í skipulagða hreyfingu. Ef mataræðið er einnig lélegt er hætta á því að lífsstíllinn fari að draga dilk á eftir sér með svokölluðum lífsstílstengdum sjúkdómum, sem geta skert lífsgæði manns til muna eða dregið mann til dauða.

Þegar við vorum lítil var hreyfing partur af daglegu lífi. Við vorum skikkuð til að hreyfa okkur í skólanum og einhver af okkur voru í íþróttum. Því miður er það oft svo að þegar komið er að ákveðnu stigi í íþróttunum þá neyðist maður til þess að hætta ef maður er ekki að stefna á afreksbrautina þar sem lítið pláss er fyrir þá sem vilja bara æfa þrisvar sinnum í viku án þess að keppa. Þessir einstaklingar vita þá oft ekki hvert þeir eiga að leita og oftar en ekki gerist það að þeir hætta að hreyfa sig vegna þess að hreyfingin er ekki partur af skipulögðu íþróttastarfi lengur. Á þessum tímapunkti í lífinu fer líka oft að verða meira að gera, skólinn, fjölskyldan, vinnan eða allt þetta tekur að mestu allan frítíma manns og því vill hreyfingin oft verða útundan. Þá eru góð ráð dýr. Eða hvað?

Sumir vinnustaðir, þó alls ekki nógu margir, hafa tekið upp á því að leyfa starfsmönnum sínum að stunda líkamsrækt á vinnutíma ásamt því að niðurgreiða, eða jafnvel gefa starfsmönnum sínum kort í líkamsræktarstöð. Þetta er eitthvað sem mér finnst að allir góðir stjórnendur hljóti að sjá sem gott tækifæri til þess að auka afköst starfsmanna. Heilbrigður starfsmaður hlýtur að skila af sér meiri vinnu og færri veikindadögum. Svo er það einnig staðreynd að hreyfing lætur okkur líða vel, einkum vegna þess að þegar við hreyfum okkur framleiðir líkaminn hormónið endorfín sem skapar vellíðunartilfinningu. Allar líkur eru því á því að starfsmaðurinn sem hreyfir sig sé léttari í lund og almennt ánægðari en sá sem gerir það ekki.

Hér með skora ég á alla vinnuveitendur að skoða starfsmannastefnu sína, athuga hvort ekki sé rúm fyrir örlitla breytingu og koma skipulagðri hreyfingu fyrir á vinnustað. Það mun skila sér margfalt til baka, ekki bara fyrir fyrirtækið heldur einnig fyrir einstaklingana og þjóðina í heild.