Facebook-fíkn Loga hrekur Retro Stefson á Strandir

„Það er nauðsynlegt að fara í smá einangrun þegar maður er að æfa nýtt efni," segir Unnsteinn Manuel Stefánsson, forsprakki hljómsveitarinnar Retro Stefson en sveitin heldur vestur í Bjarnarfjörð á Ströndum í æfingabúðir á næstu dögum.

Ástæða æfingabúðanna er sú að sveitin vinnur nú að nýrri plötu sem á að koma út síðar á þessu ári. Unnsteinn segir að sveitin sé þegar búin að taka upp fimm lög í hljóðveri og ætli sér að æfa næstu fimm á Ströndum. Sveitina skipa, auk Unnsteins, þau Þorbjörg Roach Gunnarsdóttir, Haraldur Ari Stefánsson, Þórður Jörundsson, Jón Yngvi Seljeseth, Gylfi Sigurðsson og Logi Pedro Stefánsson.

„Við verðum á Hótel Laugarhóli sem föðurbróðir minn rekur en ég hef dvalið þar með hléum síðustu tvo mánuði, meðal annars til að passa hundana. Það er frábært að vera þar á þessum tíma árs og mikil kyrrð og friður," segir Unnsteinn og bætir við að það sé nauðsynlegt fyrir hljómsveitina að koma í veg fyrir utanaðkomandi truflun við æfingar.

„Það er gott að kúpla sig út og það getur enginn skroppið í hádegismat til ömmu eða legið á netinu eins og Logi," segir Unnsteinn og vill meina að þetta verði ágætis afvötnun fyrir Loga, litla bróður sinn, sem hann segir vera mikinn net- og Facebook-fíkil.

Qween, fyrsta smáskífulagið af nýju plötunni er nú þegar komið í spilun og hefur notið mikilla vinsælda. Lagið er í öðru sæti á vinsældalistum Rásar 2 og Gogoyoko og á topp tíu lista X-sins 977. „Það er mjög gaman að lagið leggst vel í landsmenn en ég samdi það í júní í fyrra. Það átti þá að vera svona sumarsmellur en fólkinu hjá útgáfufyrirtæki okkar úti leist ekki nógu vel á það og það tók tíma fyrir þau að melta lagið," segir Unnsteinn en fyrir nokkru síðan tók sveitin lagið upp í svokölluðu Take Away Show fyrir La Blogotheque í flugskýli á Reykjavíkurflugvelli og hægt er að nálgast myndbandið af flutningnum á You Tube.

„Nýja platan verður í svipuðum stíl og lagið Qween en samt eru nokkur lög úr annarri átt. Platan verður að mestu leyti á ensku og er það algjörlega gert til að stíla inn á erlendan markað. Mér finnst samt mjög gaman að syngja á íslensku svo það getur verið að við gerum bæði enska og íslenska útgáfu af sumum lögum," segir Unnsteinn en hljómsveitin ætlar sér að spila bæði í Búðardal og á Hólmavík á meðan hún dvelur fyrir vestan.

Fyrir þá sem vilja berja þá Loga og Unnstein augum er bent á að kíkja á barinn Bakkus í kvöld þar sem þeir þeyta skífum.

[email protected]