Um handhafa sannleikans

Svartur hundur prestsins, fyrsta leikverk Auðar Övu Ólafsdóttur verður frumsýnt í Þjóðleikhúsinu annað kvöld. Kristín Jóhannesdóttir leikstjóri segir höfundinn hafa sérstæða sýn á veruleikann og lag á að bregða á hann óvenjulegu ljósi.

Auður Ava Ólafsdóttir hefur sent frá sér þrjár skáldsögur við góðar undirtektir en Svartur hundur prestsins, sem verður frumsýnt í Kassanum í Þjóðleikhúsinu annað kvöld, er hennar fyrsta leikrit.

Kristín Jóhannesdóttir leikstjóri lýsir leikritinu sem tragíkómísku verki þar sem rýnt sé í skilgreininguna á fjölskyldu og sannleikanum; hvar eignarhaldið á honum liggur og þá um leið á sjálfum veruleikanum

Svartur hundur prestsins fjallar um ættmóður sem býður syni sínum, tveimur dætrum og tengdasyni í vöfflur og greinir frá þeim ákvörðun sem kemur öllum í opna skjöldu. Dæturnar þurfa að takast á við gerbreyttar aðstæður í samskiptum við móður sína en lenda auk þess í átökum við bróður sinn sem kominn er langt að og hefur ákveðið að gerast boðberi sannleika sem allir vilja forðast.

Þetta kann að hljóma eins og uppskrift að klassísku fjölskyldudrama en að sögn Kristínar Jóhannesdóttur leikstjóra liggur fiskur undir steini.

„Auður Ava er höfundur með afar sérstaka rödd, hefur skemmtilegan húmor á veruleikan og lag á að setja hlutina í óvenjulegt samhengi. Hér er farið inn í fjölskyldu, sem hæglega má skilgreina sem misvirka, til að draga upp mynd af stærra samfélagi, og undir lúrir leyndarmál. Allt er þetta klassískt í eðli sínu en aftur á móti er meðhöndlunin svo sérstæð; hvernig farið er yfir öll mörk og landamæri í hlutverkaskipan innan fjölskyldunnar og þar með samfélagsins.“

Hún segir verkið ekki bera þess nein merki um að vera frumraun höfundar.

„Það tekur heila ævi að verða gott leikskáld og ég myndi segja að Auður Ava langt komin.“

Kristbjörg Kjeld leikur ættmóðurina en þær Kristín leiddu síðast saman hesta sína í Utan gátta, sem hlaut Grímuverðlaunin sem sýninging ársins 2009.

„Kristbjörg er ein af okkar mestu leikkonu, ef ekki sú mesta. Það eru að minnsta kosti fáar sem standa henni jafnfætis. Fyrir leikstjóra er mjög lærdómsríkt að vinna með leikara sem býr yfir jafn mikilli reynslu og þroska og Kristbjörg.“

Kristín var lengst af kvikmyndaleikstjóri söðlaði um fyrir nokkrum árum, með góðum árangri, samanber velgengni Utangátta fyrir tveimur árum. Spurð hvort hún ætli að helga sig leikhúsinu alfarið héðan í frá segir Kristín ekkert fullt og fast í sínu lífi.

„Ég vildi gjarnan ganga inn um dyr kvikmyndanna aftur en það er allt að því ofurmannlegt verkefni að safna fjármagni fyrir litla mynd, hvað þá meðalstóra eða þaðan af stærri. En mér finnst ævintýralega gaman að vinna í leikhúsi, þótt ég hafi aldrei sett stefnuna þangað.“

Með önnur hlutverk í sýningunni fara Margrét Vilhjálmsdóttir, Nanna Kristín Magnúsdóttir, Atli Rafn Sigurðarson og Baldur Trausti Hreinsson.

[email protected]