Merzedes Club var pönk

Listamaðurinn Ceres 4 (Hlynur Áskelsson) hefur komið víða við. Pönkað á plötum og hnyklað vöðvana í Merzedes Club. Hann hóf listaferilinn á ljóðaplötunni Kaldastríðsljóðin árið 2000 og hefur nú gefið þau ljóð út á glæsilegri bók, sem Þorvaldur Jónsson og Davíð Hólm myndskreyta.

„Þetta eru hörð, köld og kynþokkafull ljóð," segir Ceres 4. „Kaldastríðið var þungavigtartímabil í uppeldi okkar sem ólumst upp í því. Ljóðin skýra sig sjálf og ættu að vera hjartnæm upprifjun fyrir þá sem upplifðu tímabilið. Fyrir hina eru ljóðin sagnfræðileg heimild."

Höfundur segir gamla ljóðadiskinn orðinn „költ" og bókina sigla hraðbyri í sama „költ-status". „Upplagið er lítið og það verða bara þeir heppnu sem ná sér í eintak. Bókin verður bara til í betri Bónus-búðum. Hún er seld á kostnaðarverði svo ég græði ekkert á henni. Þeir einu sem græða eru Bónus sem fær smásöluálagninguna og ríkissjóður sem fær vaskinn. Þetta er hugsjónaútgáfa."

Ceres 4 segir ekki lokum fyrir það skotið að bankahrunið verði tekið fyrir í næstu ljóðabók. „Hver veit? Það þarf þó einhver tími að líða svo maður fái yfirsýn til að greina kjarnann frá hisminu. Síðustu misseri og komandi ár eru efni í rosalega eldfim listaverk. Þetta eru skemmtilegir tímar þótt fólk kvarti núna. Það verður gaman að líta til baka og sjá hvað stendur eftir þegar púðurrykið hefur sest."

Ceresi finnst þetta viðtal gríðarlega djúpt miðað við viðtölin sem hann fór í vegna Merzedes Club. „Þá var bara talað um brúnkukrem. Þetta er samt búið að vera frábært ár með Merzedes Club. Það er mesta pönkið sem ég hef gert. Pönk snýst um að hía á kerfið og koma aftan að því. Ég, smurður og ber að ofan, að segja „hó hó" og „hardcore" og fá borgað stórfé fyrir það frá fyrirtækjum sem eru ekki einu sinni til ennþá, mörg hver, var algjört pönk."

En er Merzedes Club-fyrirbærið dautt?

„Nei, enda deyja hljómsveitir aldrei, leggjast bara í híði. Ég heyrði í umbanum um daginn og þá var verið að setja inn nýjar raddir við einhver lög. Ég sit bara við símann og ef það verður hringt þá spreyjar maður sig með brúnkuspreyinu. Hvað gerir maður ekki fyrir peninginn á þessum síðustu og verstu?"

[email protected]