Segja stórfé borgað með Línu.neti

Sjálfstæðismenn í stjórn Orkuveitu Reykjavíkur fullyrða að fyrirtækið hafi tekið ljósleiðarapör sem engin þörf hafi verið fyrir upp í söluna á fyrirtækinu Línu.neti þegar Og Vodafone keypti það á mánudag. Greiddar hafi verið nærri 600 milljónir með fyrirtækinu við kaupsamninginn eins og hann var kynntur í stjórn Orkukveitunnar. Guðlaugur Þór Þórðarson, stjórnarmaður Sjálfstæðismanna, bendir á að Orkuveitan eigi fyrir 44 ljósleiðarapör og eignist nú fjögur til viðbótar: "Það er álíka mikil þörf fyrir þetta og að byggja nýtt hús við hliðina á Orkuveituhúsinu, sem sagt engin." Guðmundur Þóroddsson, forstjóri Orkuveitunnar, vísar því á bug að verið sé að greiða með Línu.neti: "Aðalatriðið er það að við ætlum að einbeita okkur að því að leggja og reka ljósleiðara og höfum nú tryggt okkur viðskipti til 25 ára." Og Vodafone kaupir Línu.net á 270 milljónir króna. Orkuveitan yfirtekur lán að upphæð 57 milljónir króna, kaupir eitt ljósleiðarapar á 430 milljónir, nýtir sér samkvæmt eldri samningi kauprétt á öðru ljósleiðarapari á 70 milljónir og selur svo Orkuveitunni til baka á umtalsvert hærra verði eða 355 milljónir króna. Pétur Pétursson, blaðafulltrúi Og Vodafone, segir gott ef satt væri að fyrirtækið væri að fá meðgjöf: "Hins vegar er Og Vodafone rekið á viðskiptalegum grundvelli. Við lítum svo á að við séum að kaupa fyrirtæki í rekstri og fá veltu sem bætist við okkar starfsemi og fá arðsemi af rekstri sem við getum vel sætt okkur við." Guðlaugur Þór Þórðarson segir að þetta sé enn ein greiðslan með Línu.neti: "Ævintýrið er núna búið að kosta 5 milljarða og að auki neyðist Orkuveitan til að fara í fjárfestingar upp á 3-4 milljarða við að tengja heimili." Stjórnarmaðurinn gefur lítið fyrir þau viðskipti sem koma á móti og bendir á að í upphafi hafi átt að leggja rúmar 200 milljónir í Línu.net. Niðurstaðan fimm árum síðar sé að Lína.net hafi tapað um ellefu hundruð milljónum og Orkuveitan hafi lagt fimm og hálfan milljarð í Linu.net og fyrirtæki í skyldum rekstri, þar af 2,7 milljarða í Línu.net.